Sanksionet e Bashkimit Evropian kundër Moskës “në fakt po funksionojnë kundër vetë Brukselit”, deklaroi të enjten ministria e jashtme e Rusisë, duke shtuar se “mundësitë për zgjerimin e tyre janë shteruar”.
Kështu, siç thekson Euronews, përcjell Telegrafi, Kremlini vazhdon të mohojë se masat e reja më të rrepta kanë ndonjë ndikim në ekonominë e Rusisë dhe strategjinë e luftës së Moskës në Ukrainë, duke sinjalizuar se nuk do ta ndryshojë qëndrimin e saj ndaj pushtimit dhe nuk do të bjerë dakord për një armëpushim.
Ministria e jashtme ruse tha se edhe sanksionet e SHBA-së kundër gjigantëve të naftës së vendit, Rosneft dhe Lukoil, “nuk do të shkaktojnë probleme për Rusinë, e cila ka zhvilluar një imunitet të fortë ndaj kufizimeve të tilla”.
“Megjithatë, ato dërgojnë një sinjal kundërproduktiv, përfshirë edhe nga pikëpamja e zgjidhjes së çështjes së Ukrainës”, tha zëdhënësja Maria Zakharova të enjten.
Ndërsa Dmitry Medvedev, ish-presidenti dhe ish-kryeministri i Rusisë, shkoi më tej se kaq, duke e etiketuar Uashingtonin si armik të Moskës.
“SHBA-të janë armiku ynë dhe ‘paqebërësi’ i tyre llafazan tani është nisur plotësisht në një rrugë lufte me Rusinë”, tha Medvedev, duke iu referuar presidentit të SHBA-së Donald Trump.
“Vendimet e marra janë një akt lufte kundër Rusisë. Dhe tani Trump është rreshtuar plotësisht me Evropën e çmendur”.
A do të bjerë dakord Rusia për një armëpushim?
“Tani është koha për të ndaluar vrasjet dhe për një armëpushim të menjëhershëm”, tha të mërkurën Sekretari i Thesarit i SHBA-së, Scott Bessent, duke njoftuar lajmin për sanksionet e Uashingtonit, të parat që nga kthimi i Trump në Shtëpinë e Bardhë.
“Duke pasur parasysh refuzimin e presidentit Putin për t’i dhënë fund kësaj lufte të pakuptimtë, Thesari po vendos sanksione ndaj dy kompanive më të mëdha të naftës në Rusi që financojnë makinën e luftës së Kremlinit. Thesari është i përgatitur të ndërmarrë veprime të mëtejshme nëse është e nevojshme për të mbështetur përpjekjet e presidentit Trump për t’i dhënë fund edhe një lufte tjetër. Ne i inkurajojmë aleatët tanë të bashkohen me ne dhe t’u përmbahen këtyre sanksioneve”.
Ndërsa profesori Donnacha Ó Beacháin, një shkencëtar politik në Universitetin e Qytetit të Dublinit, i tha Euronews se kjo nuk do ta bëjë Rusinë të tërhiqet në luftën e saj kundër Ukrainës.
“Nuk besoj se Putini do të tërhiqet tani ose do të bjerë dakord për një armëpushim apo negociata kuptimplote. Pse do të tërhiqej”, shtroi pyetjen Prof Ó Beacháin.
“Gjatë fundjavës, Trump thirri presidentin (Volodymyr) Zelensky në Uashington dhe, pas një takimi telefonik dy-orësh nga Putini, e qortoi udhëheqësin ukrainas, duke i thënë se duhet të pranojë kërkesat e Rusisë ose të përballet me shkatërrimin e Ukrainës”, theksoi ai.
Por me të mbërritur në samitin e BE-së të enjten në mëngjes në Bruksel, Zelensky tha se ndaj Ukrainës nuk po ushtrohet presion për lëshime territoriale dhe nuk do të lëshojë asnjë nga zonat e pushtuara përkohësisht nga Rusia.
Ndërkohë, Ó Beacháin i tha gjithashtu Euronews se Putin do të shqyrtojë një armëpushim ose negociata vetëm “kur të besojë se është në rrezik të humbasë territor ose pushtet”.
“Për (Putinin) çdo marrëveshje do të pasqyrojë realitetet në fushën e betejës. Për sa kohë që ai percepton edhe përparim minimal, ai ka pak nxitje për t’u ndalur”, theksoi ai, duke iu referuar fitimeve territoriale prej 0.4% në vitin 2025 të arritura me kosto të madhe njerëzore.
Prof Ó Beacháin theksoi se Putin e ka bërë të qartë se do të takohej me Zelenskyn vetëm “për të formalizuar një marrëveshje të paracaktuar që arrin në kapitullimin e Ukrainës”.
“Nuk ka prova që ky qëndrim ka ndryshuar”, përfundoi ai. /Telegrafi/